ബാഴ്‌സലോണയ്ക്ക് വേണ്ടി ഇറങ്ങിയ ആദ്യ മത്സരത്തിൽ ഗോൾ നേടി സ്പാനിഷ് മിഡ്ഫീൽഡർ ഡാനി ഓൽമോ. ഇന്നലെ നടന്ന ലാ ലിഗ മത്സരത്തിൽ റേയോ വല്ലെക്കാനോയ്‌ക്കെതിരെ അവസാന നിമിഷങ്ങളിൽ നേടിയാണ് ഓൽമോ വിജയം സമ്മാനിച്ചത്. 1-2 ഗോൾ സ്കോറിലാണ് ബാഴ്സയുടെ വിജയം.
ബാഴ്സയുടെ രണ്ട് ഗോളുകളും പിറന്നത് രണ്ടാം പകുതിയിൽ ആയിരുന്നു. ആദ്യ പകുതിയിലെ 9 ആം മിനിറ്റിൽ ഉനെ ലോപസ് ആണ് വല്ലക്കാനോയ്ക്ക് വേണ്ടി സ്കോർ ചെയ്‌തത്‌. രണ്ടാം പകുതിയിൽ 60 ആം മിനിറ്റിൽ പെഡ്രിയും 82ആം മിനിറ്റിൽ ലാമിൻ യമാലിന്റെ പാസിൽ ഓൽമോയും സ്കോർ ചെയ്തു.
ബാഴ്‌സലോണയിൽ തിരിച്ചെത്തിയ ഓൽമോ, ഫിനാൻഷ്യൽ നിയന്ത്രണങ്ങൾ കാരണം ആദ്യ മത്സരങ്ങളിൽ കളിക്കാൻ കഴിഞ്ഞിരുന്നില്ല. എന്നാൽ, ഇൽക്കായ് ഗുണ്ടോഗൻ മാഞ്ചസ്റ്റർ സിറ്റിയിലേക്കും ക്ലെമെന്റ് ലെംഗ്ലെറ്റ് അത്ലെറ്റിക്കോ മാഡ്രിഡിലേക്കും പോയതോടെ ഒല്മോയ്ക്ക് കളിക്കാൻ അവസരം ലഭിച്ചു.
ഇതോടെ, ലാ ലിഗയിൽ മൂന്ന് മത്സരങ്ങളും ജയിച്ച് ഒന്നാം സ്ഥാനത്താണ് ബാഴ്‌സലോണ.
