ചൊവ്വാഴ്ച എമിറേറ്റ്സ് സ്റ്റേഡിയത്തിൽ നടന്ന ആഴ്‌സണലിന്റെ ചാമ്പ്യൻസ് ലീഗ് സെമിഫൈനൽ വിജയം കാണാൻ എക്വഡോറിയൻ കൗമാര താരങ്ങളായ എഡ്വിൻ ക്വിന്റീറോയും ഹോൾഗർ ക്വിന്റീറോയും എത്തിയിരുന്നു. 16 വയസ്സുള്ള ഈ ഇരട്ട സഹോദരന്മാർക്കായി ക്ലബ് വിശദമായ വികസന പദ്ധതികളാണ് ആവിഷ്കരിക്കുന്നത്.

18 വയസ്സ് തികയുന്നതോടെ, 2027 ഓഗസ്റ്റിൽ ഇവർ ഔദ്യോഗികമായി ആഴ്‌സണലിൽ ചേരും. അതുവരെ മെയ് 13 വരെ ഇവർ ലണ്ടനിൽ തുടരും. ശേഷം ഇക്വഡോറിലെ ഇൻഡിപെൻഡീൻ ഡെൽ വാലെ ക്ലബ്ബിലേക്ക് ഇവർ തിരികെ പോകും. ലണ്ടനിലുള്ള സമയത്ത് ക്ലബ്ബിന്റെ യൂത്ത് ടീമിനൊപ്പം പരിശീലനം നടത്താനും ഫസ്റ്റ് ടീമിന്റെ ചില സെഷനുകളിൽ പങ്കെടുക്കാനും ഇവർക്ക് അവസരം ലഭിക്കും. സ്‌പോർട്ടിംഗ് ഡയറക്ടർ ആൻഡ്രിയ ബെർട്ടയുടെ മേൽനോട്ടത്തിൽ എജിഎൻ ഫുട്ബോൾ ഏജൻസി വഴി ഒമ്പത് മില്യൺ പൗണ്ട് മുടക്കിയാണ് ഡിസംബറിൽ ആഴ്‌സണൽ ഈ താരങ്ങളെ സ്വന്തമാക്കിയത്.

മികച്ച റൈറ്റ് വിങ്ങറായ എഡ്വിൻ, പന്തുമായി ഉള്ളിലേക്ക് കയറി ഇടതു കാലുകൊണ്ട് ഷൂട്ട് ചെയ്യുന്നതിൽ കേമനാണ്. ചെൽസിയുടെ എസ്റ്റേവാവോയുമായാണ് എഡ്വിനെ പലരും താരതമ്യം ചെയ്യുന്നത്. അതേസമയം, ഹോൾഗർ മികച്ച ക്രിയേറ്റിവിറ്റിയുള്ള ഒരു അറ്റാക്കിംഗ് മിഡ്‌ഫീൽഡറാണ്. അണ്ടർ-17 സൗത്ത് അമേരിക്കൻ ചാമ്പ്യൻഷിപ്പിൽ എക്വഡോറിന് വേണ്ടി മികച്ച പ്രകടനമാണ് ഇരുവരും കാഴ്ചവെച്ചത്. ഈ ടൂർണമെന്റിൽ എക്വഡോർ മൂന്നാം സ്ഥാനം നേടിയിരുന്നു. മോയിസസ് കൈസെഡോ, വില്യം പാച്ചോ, ജോയൽ ഓർഡോനെസ് തുടങ്ങിയ പ്രീമിയർ ലീഗ് താരങ്ങളെ വളർത്തിക്കൊണ്ടുവന്ന ഇൻഡിപെൻഡീൻ ഡെൽ വാലെ അക്കാദമിയിൽ നിന്നാണ് ഈ ഇരട്ട സഹോദരങ്ങളും എത്തുന്നത്.

ഇവർക്ക് പുറമെ, ഷാംറോക്ക് റോവേഴ്സിൽ നിന്ന് റിപ്പബ്ലിക് ഓഫ് അയർലൻഡിന്റെ യൂത്ത് ഇന്റർനാഷണൽ താരം വിക്ടർ ഒജിയാൻവുനയെയും ആഴ്‌സണൽ ജനുവരിയിൽ ടീമിലെത്തിക്കും. ഏകദേശം 1.75 മില്യൺ പൗണ്ടിന്റെ കരാറിലാണ് ഈ ട്രാൻസ്ഫർ നടക്കുന്നത്.