ഫ്രഞ്ച് ലീഗ് കിരീടപ്പോരാട്ടത്തിൽ പി.എസ്.ജിക്ക് കനത്ത തിരിച്ചടി. സ്വന്തം തട്ടകത്തിൽ നടന്ന മത്സരത്തിൽ ലോറിയന്റുമായി 2-2 എന്ന സ്കോറിന് പി.എസ്.ജി സമനിലയിൽ പിരിഞ്ഞു.
മത്സരത്തിൽ ഇബ്രാഹിം എംബായെയുടെ ഗോളിലൂടെ ചാമ്പ്യന്മാരായ പി.എസ്.ജി ലീഡ് നേടിയിരുന്നു. എന്നാൽ, തിരിച്ചടിച്ച ലോറിയന്റ് മത്സരം സമനിലയിലാക്കി ആതിഥേയർക്ക് സമ്മർദ്ദം നൽകി. പകരക്കാരനായി ഇറങ്ങിയ സായർ-എമറിയിലൂടെ പി.എസ്.ജി വീണ്ടും ലീഡ് തിരിച്ചുപിടിച്ചു. മൈതാനത്തിറങ്ങിയ ഉടൻ തന്നെ ആദ്യ ടച്ചിലൂടെ ഗോൾ നേടിയ താരം തന്റെ മികവും ശാന്തതയും തെളിയിച്ചു.
തുടർന്ന് കളി നിയന്ത്രിക്കുന്നതിൽ പി.എസ്.ജി പരാജയപ്പെട്ടു. പ്രതിരോധത്തിലെ പിഴവിനെ മുതലെടുത്ത് ടോസിനിലൂടെ ലോറിയന്റ് വീണ്ടും സമനില ഗോൾ കണ്ടെത്തി. ഈ സമനിലയോടെ ലീഗിൽ രണ്ടാം സ്ഥാനക്കാരായ ലെൻസിനേക്കാൾ ഏഴ് പോയിന്റ് മാത്രമാണ് പി.എസ്.ജിക്ക് മുന്നിലുള്ളത്. ഇന്ന് വൈകിട്ട് നടക്കുന്ന മത്സരത്തിൽ നിസിനെതിരെ ലെൻസ് വിജയിക്കുകയാണെങ്കിൽ പോയിന്റ് വ്യത്യാസം നാലായി കുറയും.