പ്രീമിയർ ലീഗിൽ ചെൽസിക്കെതിരായ നിർണായക മത്സരത്തിന് തയ്യാറെടുക്കുന്ന ലിവർപൂളിന് കനത്ത തിരിച്ചടി. മെയ് 6 ബുധനാഴ്ച നടന്ന ടീം പരിശീലനത്തിൽ ലിവർപൂളിന്റെ പ്രധാന താരങ്ങൾ പലരും പങ്കെടുത്തില്ല.
ലിവർപൂൾ എക്കോ റിപ്പോർട്ട് ചെയ്യുന്നതനുസരിച്ച്, അലക്സാണ്ടർ ഇസാക്ക്, മുഹമ്മദ് സല, ജോർജി മമർദാഷ്വിലി, ആലിസൺ ബെക്കർ എന്നിവർ പരിശീലന സെഷനിൽ നിന്ന് വിട്ടുനിന്നു. പ്രതിരോധ താരം ഇബ്രാഹിമ കൊണാട്ടെയും പരിശീലനത്തിൽ പങ്കെടുത്തിട്ടില്ല.
മാഞ്ചസ്റ്റർ യുണൈറ്റഡിനെതിരായ മത്സരത്തിൽ ഗ്രോയിൻ ഇഞ്ചുറി കാരണം അലക്സാണ്ടർ ഇസാക്ക് കളിച്ചിരുന്നില്ല. ഏപ്രിൽ 25-ന് ക്രിസ്റ്റൽ പാലസിനെതിരായ മത്സരത്തിൽ ഹാംസ്ട്രിങ് ഇഞ്ചുറി സംഭവിച്ച മുഹമ്മദ് സല നിലവിൽ വിശ്രമത്തിലാണ്. സീസൺ അവസാനിക്കുന്നതിന് മുൻപ് സല തിരിച്ചെത്തുമെന്നാണ് പ്രതീക്ഷിക്കുന്നത്.
ഹാംസ്ട്രിങ് പ്രശ്നം കാരണം ഗോൾകീപ്പർ ആലിസൺ ബെക്കർ ഇപ്പോഴും പുറത്താണ്. ഈ സീസണിൽ പത്ത് ലീഗ് മത്സരങ്ങൾ അദ്ദേഹത്തിന് ഇതിനോടകം നഷ്ടമായി. സീസണിന്റെ അവസാന ഘട്ടത്തിലേക്ക് കടക്കുമ്പോൾ അദ്ദേഹത്തിന്റെ ശാരീരികക്ഷമതയെക്കുറിച്ച് ആശങ്കകൾ നിലനിൽക്കുന്നുണ്ട്.
കഴിഞ്ഞ മാസം എവർട്ടനെതിരായ മെഴ്സിസൈഡ് ഡെർബി വിജയത്തിനിടെ കാൽമുട്ടിന് പരിക്കേറ്റ ജോർജി മമർദാഷ്വിലിയും ടീമിന് പുറത്താണ്. വാരാന്ത്യത്തിൽ ഓൾഡ് ട്രാഫോർഡിൽ നടന്ന മത്സരത്തിനിടെ ഇബ്രാഹിമ കൊണാട്ടെയെ പകരക്കാരനായി പിൻവലിച്ചിരുന്നു. എന്തുകൊണ്ടാണ് അദ്ദേഹം പരിശീലനത്തിൽ പങ്കെടുക്കാതിരുന്നത് എന്നതിൽ വ്യക്തതയില്ല.