ഇന്ത്യൻ സൂപ്പർ ലീഗിലെ വേഗതയേറിയ ഗോൾ സ്വന്തമാക്കി മലയാളിയും ഈസ്റ്റ് ബംഗാൾ FC ഫോർവേഡുമായ പുതിയ വളപ്പിൽ വിഷ്ണു. ഫെബ്രുവരി 29 ന് നടന്ന ഒഡീഷ എഫ്‌സിക്ക് എതിരായ മത്സരത്തിലാണ് വെറും 32 സെക്കൻഡുകളിൽ പന്ത് വലയിലെത്തിക്കുന്നതിലൂടെ നിലവിലെ 2023-24 ഐഎസ്എൽ സീസണിലെ ഏറ്റവും വേഗതയേറിയ ഗോൾ നേടിയത്.
2023 ഓഗസ്റ്റിൽ ഈസ്റ്റ് ബംഗാളിൽ ചേർന്ന 22 കാരനായ വിഷ്ണു, ഈ സീസണിൽ കാൾസ് ക്വാഡ്രാട്ടിന്റെ കീഴിൽ 14 ഐഎസ്എൽ മത്സരങ്ങൾ കളിച്ചിട്ടുണ്ട്. ഈ മത്സരങ്ങളിൽ ഒരു ഗോളും ഒരു അസിസ്റ്റും അദ്ദേഹത്തിന്റെ പേരിലുണ്ട്.
ലീഗ് ചരിത്രത്തിലെ അഞ്ചാമത്തെ വേഗതയേറിയ ഗോളാണ് വിഷ്ണുവിന്റെ ഗോൾ.
ഐഎസ്എൽ-ൽ ഏറ്റവും വേഗത്തിൽ ഗോൾ നേടിയ റെക്കോർഡ് ഓസ്ട്രേലിയൻ സെന്റർ ഫോർവേഡ് ഡേവിഡ് വില്യംസിന്റെ പേരിലാണ്. 2021-22 ഐഎസ്എൽ സീസണിൽ ഫത്തോർഡയിൽ എടി കെ മോഹൻ ബഗാന് വേണ്ടി ഹൈദരാബാദ് എഫ്‌സിക്ക് എതിരായ മത്സരത്തിൽ ആദ്യ 12 സെക്കൻഡുകൾക്കുള്ളിൽ ഗോൾ നേടിയാണ് താരം അന്ന് റെക്കോർഡ് സ്വന്തമാക്കിയത്.