പോയിന്റ് പട്ടികയിൽ എതിരാളികളേക്കാൾ 11 പോയിന്റ് മുന്നിലാണ് ഹാൻസി ഫ്ലിക്കിന്റെ ബാഴ്സലോണ. ഒരു പോയിന്റ് കിട്ടിയാൽ തന്നെ കിരീടം ഉറപ്പാക്കാമെങ്കിലും ചരിത്രനേട്ടമാണ് ബാഴ്സയുടെ ലക്ഷ്യം. റയൽ മാഡ്രിഡിനെതിരെ ഉൾപ്പെടെ ശേഷിക്കുന്ന നാല് മത്സരങ്ങളും വിജയിച്ചാൽ, ലാ ലിഗയിൽ 100 പോയിന്റ് എന്ന റെക്കോർഡിനൊപ്പം എത്താൻ ബാഴ്സയ്ക്ക് സാധിക്കും. റയൽ മാഡ്രിഡിനെയും തുടർന്ന് റയൽ ബെറ്റിസിനെയും തോൽപ്പിക്കാനായാൽ, 38 മത്സരങ്ങളുള്ള ലാ ലിഗ സീസണിൽ സ്വന്തം തട്ടകത്തിലെ എല്ലാ മത്സരങ്ങളും ജയിക്കുന്ന ആദ്യ ടീമായി ബാഴ്സലോണ മാറും.
റയൽ മാഡ്രിഡിനെ സംബന്ധിച്ചിടത്തോളം ഈ സീസൺ വളരെ ബുദ്ധിമുട്ടേറിയതാണ്. ഈ നൂറ്റാണ്ടിൽ അഞ്ചാം തവണയാണ് കിരീടങ്ങളില്ലാതെ അവർ സീസൺ അവസാനിപ്പിക്കുന്നത്. ഇതിനിടയിൽ പരിശീലനത്തിന് ശേഷം ഫ്രഞ്ച് മിഡ്ഫീൽഡർ ഓറേലിയൻ ടൗമേനിയും സഹതാരം ഫെഡറിക്കോ വാൽവെർദെയും തമ്മിലുണ്ടായ സംഘർഷം വലിയ ആശങ്കയായി. തലയ്ക്ക് പരിക്കേറ്റ വാൽവെർദെക്ക് ആശുപത്രിയിൽ ചികിത്സ തേടേണ്ടി വരികയും രണ്ടാഴ്ചത്തേക്ക് കളിക്കാൻ സാധിക്കാത്ത അവസ്ഥയുമാണ്.
രണ്ട് താരങ്ങൾക്കും ക്ലബ്ബ് 500,000 യൂറോ (590,000 ഡോളർ) വീതം പിഴ ചുമത്തിയിട്ടുണ്ട്. ഇരുവരും പരസ്പരവും സഹതാരങ്ങളോടും പരിശീലകരോടും ആരാധകരോടും ഖേദം പ്രകടിപ്പിച്ചതായി ക്ലബ്ബ് വ്യക്തമാക്കി.
ബാഴ്സലോണ vs റയൽ മാഡ്രിഡ്, എൽ ക്ലാസിക്കോ 2026 കാണാനുള്ള വിവരങ്ങൾ
ബാഴ്സലോണ vs റയൽ മാഡ്രിഡ് മത്സരം എന്നാണ് നടക്കുക?
ബാഴ്സലോണയും റയൽ മാഡ്രിഡും തമ്മിലുള്ള ലാ ലിഗ പോരാട്ടം തിങ്കളാഴ്ച (മേയ് 11) നടക്കും. ഇന്ത്യൻ സമയം പുലർച്ചെ 12:30-നാണ് മത്സരം ആരംഭിക്കുന്നത്.
മത്സരം എവിടെയാണ് നടക്കുന്നത്?
ബാഴ്സലോണയും റയൽ മാഡ്രിഡും തമ്മിലുള്ള ലാ ലിഗ മത്സരം കാംപ് നൗവിലാണ് നടക്കുന്നത്.
മത്സരം ടെലിവിഷനിൽ കാണാൻ സാധിക്കുമോ?
ബാഴ്സലോണ vs റയൽ മാഡ്രിഡ് ലാ ലിഗ മത്സരത്തിന്റെ തത്സമയ സംപ്രേഷണം ഇന്ത്യയിലെ ടെലിവിഷൻ ചാനലുകളിൽ ഉണ്ടായിരിക്കില്ല.
മത്സരം തത്സമയം ഓൺലൈനിൽ കാണുന്നത് എങ്ങനെ?
ഫാൻകോഡ് (FanCode) വഴി ഇന്ത്യയിൽ ബാഴ്സലോണ vs റയൽ മാഡ്രിഡ് മത്സരം തത്സമയം കാണാം.