സെരി എ: കഗ്ലിയാരി ഡിഫൻഡർക്കെതിരെ വംശീയാധിക്ഷേപ ആരോപണവുമായി കീനൻ ഡേവിസ്
സെരി എ ഫുട്ബോൾ മത്സരത്തിനിടെ കഗ്ലിയാരി ഡിഫൻഡർ ആൽബർട്ടോ ഡോസെനയ്ക്കെതിരെ വംശീയാധിക്ഷേപം നടത്തിയെന്ന ഗുരുതര ആരോപണവുമായി ഉഡിനീസെ സ്ട്രൈക്കർ കീനൻ ഡേവിസ് രംഗത്തെത്തി. 36-ാം റൗണ്ട് മത്സരത്തിനിടെയാണ് സംഭവം.
രണ്ടാം പകുതിയിൽ ഇരു താരങ്ങളും തമ്മിലുണ്ടായ കടുത്ത വാഗ്വാദം സംഘർഷത്തിലേക്ക് നീങ്ങിയതോടെ റഫറിക്ക് മത്സരം തടസ്സപ്പെടുത്തേണ്ടി വന്നു. പിന്നീട് മത്സരം പുനരാരംഭിക്കുകയും ഉഡിനീസെ 2-0 എന്ന സ്കോറിന് വിജയം സ്വന്തമാക്കുകയും ചെയ്തു. എന്നാൽ മത്സരശേഷം വലിയ വിവാദങ്ങൾക്കാണ് ഈ സംഭവം വഴിവെച്ചത്.
മത്സരശേഷം സോഷ്യൽ മീഡിയയിലൂടെയാണ് കീനൻ ഡേവിസ് തന്റെ നിലപാട് വ്യക്തമാക്കിയത്. വംശീയാധിക്ഷേപത്തെക്കുറിച്ച് താൻ മത്സരത്തിനിടെ റഫറിയോട് പരാതിപ്പെട്ടിരുന്നുവെന്നും, എന്നാൽ തന്റെ വൈകാരികമായ പ്രതികരണത്തിന് മറുപടിയായി റഫറി തനിക്ക് മഞ്ഞക്കാർഡ് നൽകുകയാണ് ചെയ്തതെന്നും ഡേവിസ് പറഞ്ഞു.
“ഇന്ന് മത്സരത്തിനിടെ ഈ വംശീയവാദിയായ ഭീരു എന്നെ കുരങ്ങൻ എന്ന് വിളിച്ചു. ഫുട്ബോൾ അസോസിയേഷൻ ഇതിൽ എന്തെങ്കിലും നടപടിയെടുക്കുമെന്ന് ഞാൻ പ്രതീക്ഷിക്കുന്നു, എന്താണ് സംഭവിക്കാൻ പോകുന്നതെന്ന് കാത്തിരുന്ന് കാണാം,” ഇൻസ്റ്റാഗ്രാം സ്റ്റോറിയിൽ ഡേവിസ് കുറിച്ചു.
കളിക്കളത്തിൽ നടക്കുന്ന വംശീയാധിക്ഷേപങ്ങൾ കൈകാര്യം ചെയ്യുന്നതിൽ ഇറ്റാലിയൻ ഫുട്ബോൾ അധികൃതർ വലിയ വിമർശനങ്ങൾ നേരിടുന്ന സാഹചര്യത്തിൽ, ഈ സംഭവം അവർ വിശദമായി പരിശോധിക്കുമെന്നാണ് കരുതപ്പെടുന്നത്.