മാഞ്ചസ്റ്റർ യുണൈറ്റഡ് തങ്ങളുടെ ഭാവി പദ്ധതികളിൽ ഗോൾകീപ്പർ ആന്ദ്രേ ഒനാനയെ ഉൾപ്പെടുത്തിയിട്ടില്ലെന്ന് വ്യക്തമാക്കിയതോടെ, താരത്തെ ടീമിൽ നിലനിർത്താൻ ശ്രമം തുടങ്ങി ട്രബ്സോൺസ്പോർ.
തുർക്കിയിൽ ലോൺ അടിസ്ഥാനത്തിൽ കളിക്കുന്ന ഈ കാമറൂൺ താരം മികച്ച പ്രകടനമാണ് പുറത്തെടുക്കുന്നത്. ട്രബ്സോൺസ്പോറിനെ ടർക്കിഷ് കപ്പ് ഫൈനലിലെത്തിക്കുന്നതിൽ താരം നിർണ്ണായക പങ്കുവഹിച്ചു. എങ്കിലും, ഈ വേനൽക്കാലത്ത് ഒനാനയെ ടീമിലേക്ക് തിരിച്ചെടുക്കാൻ മാഞ്ചസ്റ്റർ യുണൈറ്റഡിന് താൽപ്പര്യമില്ല. അൽതായ് ബയന്ദിർ ക്ലബ്ബ് വിടുകയാണെങ്കിൽ മറ്റൊരു ഗോൾകീപ്പറെ ആവശ്യമായി വരുമെങ്കിലും, ഉയർന്ന ശമ്പളവും ഒനാനയുടെ വ്യക്തിത്വവും കാരണം ബാക്കപ്പ് ഗോൾകീപ്പർ എന്ന നിലയിൽ അദ്ദേഹത്തെ ടീമിൽ നിലനിർത്തുന്നത് പ്രായോഗികമല്ലെന്നാണ് യുണൈറ്റഡ് മാനേജ്മെന്റിന്റെ വിലയിരുത്തൽ.
നിലവിൽ മറ്റൊരു ലോൺ കരാറിലൂടെ ഒനാനയെ ടീമിൽ നിലനിർത്താനാണ് ട്രബ്സോൺസ്പോർ ആഗ്രഹിക്കുന്നത്. എന്നാൽ, സ്ഥിരമായുള്ള ട്രാൻസ്ഫർ സാധ്യതകളും തള്ളിക്കളയാനാവില്ല. 2023-ൽ ഇന്റർ മിലാനിൽ നിന്ന് 47.2 ദശലക്ഷം പൗണ്ട് മുടക്കിയാണ് ഒനാനയെ യുണൈറ്റഡ് സ്വന്തമാക്കിയത്. ഈ തുകയുടെ ഒരു ഭാഗം തിരിച്ചുപിടിക്കാൻ ക്ലബ്ബ് ശ്രമിക്കുമ്പോൾ, ആ തുക നൽകാൻ തുർക്കിഷ് ക്ലബ്ബിന് സാധിക്കുമോ എന്നത് കണ്ടറിയണം.
അതേസമയം, ഒനാനയുടെ കാര്യത്തിൽ ബെസിക്താസും നിരീക്ഷണം തുടരുന്നുണ്ട്. ജൂലൈയിൽ പ്രീ-സീസൺ ആരംഭിക്കുന്നതിന് മുൻപ് തന്നെ ഒനാനയുടെ കാര്യത്തിൽ അന്തിമ തീരുമാനം എടുക്കാനുള്ള തിടുക്കത്തിലാണ് മാഞ്ചസ്റ്റർ യുണൈറ്റഡ്.