ആഴ്സണലുമായുള്ള ചാമ്പ്യൻസ് ലീഗ് ഫൈനലിന് പത്ത് ദിവസം മാത്രം ശേഷിക്കെ, ടീമിന്റെ തയ്യാറെടുപ്പുകളെക്കുറിച്ചും മാനസികാവസ്ഥയെക്കുറിച്ചും പിഎസ്‌ജി പരിശീലകൻ ലൂയിസ് എൻറിക്വെ മാധ്യമങ്ങളോട് സംസാരിച്ചു.

“എല്ലാവരും സജ്ജരാണ്. വ്യത്യസ്തമായ രീതിയിലാണ് എല്ലാവരും എത്തിച്ചേരുന്നത്. എന്നാൽ വരുംദിവസങ്ങളിൽ ചെറിയ ആക്രമണ-പ്രതിരോധ തന്ത്രങ്ങളിൽ ശ്രദ്ധ കേന്ദ്രീകരിച്ച് പരിശീലനവും വിശ്രമവും നിറഞ്ഞ തിരക്കേറിയ ഒരു ആഴ്ചയാകും ഇത്. ബാക്കിയുള്ള സമയം പാരീസിലും ബുഡാപെസ്റ്റിലും സൂര്യപ്രകാശത്താൽ ധന്യമാകും!” സ്പാനിഷ് പരിശീലകൻ പറഞ്ഞു.

“ക്യാമ്പസിലെത്തുന്ന കളിക്കാർ സന്തോഷത്തോടെ സമയം ചിലവഴിക്കുക എന്നതാണ് പ്രധാനം. സഹതാരങ്ങളോടൊപ്പം സമയം ചെലവഴിക്കുന്നതും നീന്തൽക്കുളത്തിൽ ഇറങ്ങുന്നതും പോലെ രസകരമായ കാര്യങ്ങളിലൂടെ ജോലി നിർവ്വഹിക്കുക എന്നത് വളരെ പ്രധാനമാണ്. കുടുംബത്തോടൊപ്പം സമയം ചെലവഴിക്കാൻ കളിക്കാർക്ക് അവധി ദിവസങ്ങൾ ആവശ്യമാണ്.” അദ്ദേഹം കൂട്ടിച്ചേർത്തു.

സമ്മർദ്ദത്തെ കൈകാര്യം ചെയ്യുന്നതിനെക്കുറിച്ച്: “കഴിഞ്ഞ വർഷം സമ്മർദ്ദം കൂടുതലായിരുന്നു, അത് കൈകാര്യം ചെയ്യാൻ വളരെ പ്രയാസമായിരുന്നു. സമാനമായ സാഹചര്യങ്ങളാണ് ഇപ്പോഴുമുള്ളത്, എന്നാൽ ഭൂരിഭാഗം താരങ്ങൾക്കും ഈ രീതി അറിയാം. ഈ സമ്മർദ്ദത്തെ എങ്ങനെ നേരിടണം എന്ന് അറിയുന്നത് നിർണ്ണായകമാകും, കഴിഞ്ഞ വർഷത്തെ അപേക്ഷിച്ച് ഞങ്ങൾ കൂടുതൽ തയ്യാറെടുപ്പിലാണെന്ന് ഞാൻ വിശ്വസിക്കുന്നു.”

ടീമിന്റെ പൊരുത്തപ്പെടലിനെക്കുറിച്ച്: “എതിരാളികളെക്കാൾ കൂടുതൽ നമ്മളിലേക്ക് ശ്രദ്ധ കേന്ദ്രീകരിക്കുന്നതാണ് പ്രധാനം. മികച്ച മത്സരങ്ങളിൽ എതിരാളികൾക്ക് അനുസൃതമായി ഞങ്ങൾ കളിയുടെ ശൈലി മാറ്റാറുണ്ട്. ബയേണിനും ആഴ്സണലിനും മികച്ച രീതിയിൽ പന്ത് കൈവശം വെക്കാനുള്ള കഴിവുണ്ട്. ഇത്തരം മത്സരങ്ങളിൽ ഞങ്ങൾ കൂടുതൽ മെച്ചപ്പെട്ടിട്ടുണ്ട്, അതിൽ ഞങ്ങൾ സന്തുഷ്ടരുമാണ്.”

താരങ്ങളുടെ വിശ്രമവും ക്ഷേമവും സംബന്ധിച്ച്: “എനിക്ക് വിശ്രമം വളരെ പ്രധാനമാണ്. സുഹൃത്തുക്കൾക്കും കുടുംബത്തിനുമൊപ്പം സമയം ചെലവഴിക്കാൻ താരങ്ങൾക്ക് സാധിക്കണം. ക്യാമ്പസിലെത്തുമ്പോൾ കളിക്കാർ സന്തോഷത്തോടെയിരിക്കാൻ ഞാൻ ആഗ്രഹിക്കുന്നു. വരും ആഴ്ചകളിൽ ഒരു ചെറിയ കുടുംബം പോലെ പ്രവർത്തിക്കാനാണ് ഞങ്ങൾ ലക്ഷ്യമിടുന്നത്.”