ഈ സീസണിന് ശേഷവും മാഞ്ചസ്റ്റർ യുണൈറ്റഡിൽ തുടരുന്നതിനെക്കുറിച്ചുള്ള ചോദ്യത്തിന് മറുപടിയായി, തൻ്റെ ഭാവി ഉടൻ തീരുമാനിക്കുമെന്ന് മൈക്കൽ കാരിക് വാർത്താസമ്മേളനത്തിൽ പറഞ്ഞു. ഇതിൽ മാറ്റങ്ങളൊന്നുമില്ലെന്നും വലിയ അനിശ്ചിതത്വങ്ങൾ നിലവിലില്ലെന്നും അദ്ദേഹം വ്യക്തമാക്കി.

“മാഞ്ചസ്റ്റർ യുണൈറ്റഡ് ഒരു സവിശേഷമായ ഫുട്ബോൾ ക്ലബ്ബാണ്. ഒരു ആരാധകനായും മുൻ താരമായും ക്ലബ്ബിലേക്ക് മടങ്ങിയെത്താനും ടീമിനെ സഹായിക്കാനും സാധിച്ചത് വലിയ അഭിമാനമായി കാണുന്നു,” കാരിക് കൂട്ടിച്ചേർത്തു.

ചാമ്പ്യൻസ് ലീഗിലേക്ക് മടങ്ങിയെത്തിയത് വലിയ നേട്ടമാണെന്നും ഇതുവരെയുള്ള പ്രവർത്തനങ്ങളിൽ തൃപ്തനാണെന്നും അദ്ദേഹം പറഞ്ഞു.

ടീമിൻ്റെ ചുമതലയിൽ കാരിക്ക് തുടരുന്നത് സംബന്ധിച്ച് അദ്ദേഹത്തിൻ്റെ പ്രതിനിധികൾ മാഞ്ചസ്റ്റർ യുണൈറ്റഡ് മാനേജ്മെൻ്റുമായി ചർച്ചകൾ നടത്തിവരികയാണ്.

ഒരു വർഷത്തെ നീട്ടിനൽകാനുള്ള ഓപ്ഷനോടു കൂടി രണ്ട് വർഷത്തെ പുതിയ കരാർ കാരിക്കിന് നൽകാനാണ് ക്ലബ്ബ് പദ്ധതിയിടുന്നത്. ക്ലബ്ബിലെ പ്രധാന തീരുമാനങ്ങൾ എടുക്കുന്നവരെല്ലാം ഈ തീരുമാനത്തിൽ ഇതിനകം തന്നെ യോജിപ്പിലെത്തിയിട്ടുണ്ട്.