ലയണൽ മെസ്സിയുടെ കരിയറിലെ തുടക്കകാലത്ത് തന്നെ അദ്ദേഹത്തിന്റെ കഴിവുകളെക്കുറിച്ച് റൊണാൾഡീഞ്ഞോയ്ക്ക് കൃത്യമായ ബോധ്യമുണ്ടായിരുന്നുവെന്ന് മുൻ ബാഴ്‌സലോണ താരം മാക്സി ലോപ്പസ് വെളിപ്പെടുത്തി. വെറും 16 വയസ്സുള്ളപ്പോഴേ മെസ്സി തന്നേക്കാൾ മികച്ച താരമാണെന്ന് റൊണാൾഡീഞ്ഞോ തിരിച്ചറിഞ്ഞിരുന്നുവെന്നാണ് ലോപ്പസ് പറയുന്നത്.

“പതിനാറുകാരനായ മെസ്സിക്ക് 30 വയസ്സുള്ള കളിക്കാർക്കെതിരെ പോലും അനായാസം പിടിച്ചുനിൽക്കാൻ കഴിയുമെന്ന് അന്ന് തന്നെ എനിക്ക് മനസ്സിലായിരുന്നു. അത്രയധികം കരുത്തും വേഗതയും ആ കുട്ടിക്ക് ഉണ്ടായിരുന്നു. അവൻ മറ്റുള്ളവരിൽ നിന്ന് വ്യത്യസ്തനാണെന്ന് ഞങ്ങൾ മുതിർന്ന കളിക്കാർ അന്ന് പരസ്പരം സംസാരിക്കുമായിരുന്നു,” ലോപ്പസ് പറഞ്ഞു.

“റൊണാൾഡീഞ്ഞോ എപ്പോഴും പറയുമായിരുന്നു, ‘ഈ പയ്യൻ എന്നേക്കാൾ മികച്ചതാണ്’ എന്ന്. റൊണാൾഡീഞ്ഞോ തന്റെ കരിയറിലെ ഏറ്റവും മികച്ച ഫോമിലായിരുന്ന സമയമായിരുന്നു അത്. അദ്ദേഹം ബാലൺ ഡി ഓർ പുരസ്‌കാരം നേടിയ അതേ വർഷമാണ് എന്നോട് ഇക്കാര്യം പറയുന്നത്. അസാധാരണമായ കഴിവുള്ളവർക്ക് മറ്റുള്ളവരിൽ അത്തരമൊരു പ്രതിഭയുണ്ടെന്ന് നേരത്തെ തിരിച്ചറിയാൻ സാധിക്കും.”

“ഇന്ന് മെസ്സി ഒരു വലിയ താരവും ടീമിന്റെ നായകനുമൊക്കെയാണ്. എന്നാൽ അന്നത്തെ ആ മെസ്സി വളരെ ചെറുപ്പവും നാണം കുണുങ്ങിയുമായിരുന്നു. എങ്കിലും കൂടെയുള്ളപ്പോൾ വളരെ രസകരമായ സ്വഭാവമായിരുന്നു അവന്റേത്,” അദ്ദേഹം കൂട്ടിച്ചേർത്തു.