ഇന്ത്യൻ വുമൺസ് ലീഗ് 2025-26 സീസണിൽ തകർപ്പൻ പ്രകടനവുമായി ഈസ്റ്റ് ബംഗാൾ എഫ്സി. ഞായറാഴ്ച ഈസ്റ്റ് ബംഗാൾ ഗ്രൗണ്ടിൽ നടന്ന മത്സരത്തിൽ ഗോകുലം കേരള എഫ്സിയെ ഒന്നിനെതിരെ രണ്ട് ഗോളുകൾക്കാണ് ഈസ്റ്റ് ബംഗാൾ പരാജയപ്പെടുത്തിയത്. ലീഗിലെ തങ്ങളുടെ അപരാജിത കുതിപ്പ് ഈ വിജയത്തോടെ ടീം നിലനിർത്തി. അതേസമയം, നടന്ന മറ്റ് മത്സരങ്ങളിൽ സേതു എഫ്സിയും കിക്ക്സ്റ്റാർട്ട് എഫ്സി കർണാടകയും വിജയം സ്വന്തമാക്കിയപ്പോൾ, നിത ഫുട്ബോൾ അക്കാദമി-ഗർവാൾ യുണൈറ്റഡ് എഫ്സി മത്സരം ഗോള്രഹിത സമനിലയിൽ അവസാനിച്ചു.
മത്സരത്തിന്റെ ആറാം മിനിറ്റിൽ തന്നെ ഈസ്റ്റ് ബംഗാൾ ലീഡ് നേടി. ലോംഗ് ബോളിൽ നിന്ന് ലഭിച്ച പന്ത് അതിമനോഹരമായ വോളിയിലൂടെ ഗോൾകീപ്പറെ മറികടന്ന് ഫസീല ഇക്വാപുട്ട് വലയിലാക്കി. ആദ്യ പകുതിയിലുടനീളം പന്ത് കൈവശം വെച്ച് ഈസ്റ്റ് ബംഗാൾ കളി നിയന്ത്രിച്ചെങ്കിലും ഗോകുലം കേരളയ്ക്ക് സമനില കണ്ടെത്താനായില്ല.
65-ാം മിനിറ്റിൽ ഈസ്റ്റ് ബംഗാൾ ലീഡ് വർധിപ്പിച്ചു. ഇടതുവശത്ത് നിന്ന് റെസ്റ്റി നാൻസിരി നൽകിയ പാസ് സ്വീകരിച്ച് ഫസീല ഇക്വാപുട്ട് കൃത്യമായ ഫിനിഷിംഗിലൂടെ പന്ത് വലയിലെത്തിച്ചു. 70-ാം മിനിറ്റിൽ കോർണർ കിക്കിൽ നിന്നായിരുന്നു ഗോകുലം കേരളയുടെ മറുപടി ഗോൾ. ഗോൾകീപ്പർ ഇലാംഗംബാം ചാനുവിന് പന്ത് കൈകാര്യം ചെയ്യുന്നതിൽ പിഴവ് പറ്റിയപ്പോൾ, അവസരം മുതലെടുത്ത് ശുഭാംഗി സിംഗ് പന്ത് വലയിലാക്കി. പിന്നീട് ഗോളുകൾ നേടാനുള്ള ഇരു ടീമുകളുടെയും ശ്രമങ്ങൾ വിഫലമായതോടെ ഈസ്റ്റ് ബംഗാൾ വിജയം ഉറപ്പിച്ചു. 27 പോയിന്റുമായി ഈസ്റ്റ് ബംഗാൾ പട്ടികയിൽ ഒന്നാമത് തുടരുമ്പോൾ, 10 പോയിന്റുമായി ഗോകുലം കേരള അഞ്ചാം സ്ഥാനത്താണ്.
നേരത്തെ നടന്ന മത്സരത്തിൽ ശ്രീഭൂമി എഫ്സിയെ ഒന്നിനെതിരെ രണ്ട് ഗോളുകൾക്ക് സേതു എഫ്സി പരാജയപ്പെടുത്തി. 12-ാം മിനിറ്റിൽ നിർമ്മല ദേവി നൽകിയ പന്ത് ഹെഡ്ഡറിലൂടെ സുമതി കുമാരി ലക്ഷ്യത്തിലെത്തിച്ചു. പിന്നീട് സുമതിയുടെ ഷോട്ട് ഗോൾകീപ്പർ അഞ്ജില തുംബാപോ സുബ്ബ തടഞ്ഞെങ്കിലും, റീബൗണ്ട് പന്ത് എസ്. ലിൻഡ കോം വലയിലെത്തിച്ച് ലീഡ് ഉയർത്തി. 37-ാം മിനിറ്റിൽ പെനാൽറ്റിയിലൂടെ ഫിലോമിന അബക്കയാണ് ശ്രീഭൂമിക്കായി ഗോൾ മടക്കിയത്.
മറ്റൊരു മത്സരത്തിൽ സെസ ഫുട്ബോൾ അക്കാദമിയെ എതിരില്ലാത്ത മൂന്ന് ഗോളുകൾക്ക് കിക്ക്സ്റ്റാർട്ട് എഫ്സി കർണാടക തോൽപ്പിച്ചു. നിത ഫുട്ബോൾ അക്കാദമിയും ഗർവാൾ യുണൈറ്റഡ് എഫ്സിയും തമ്മിലുള്ള മത്സരം ഗോള്രഹിതമായി പിരിഞ്ഞു. 15 പോയിന്റുമായി നിത എഫ്സി പട്ടികയിൽ മൂന്നാം സ്ഥാനത്തും, എട്ട് പോയിന്റുമായി ഗർവാൾ യുണൈറ്റഡ് ഏഴാം സ്ഥാനത്തുമാണ്.
Published on May 03, 2026