2025/26 എഫ്‌എ കപ്പ് ഫൈനലിൽ ചെൽസിയെ 1-0 എന്ന സ്‌കോറിന് പരാജയപ്പെടുത്തി മാഞ്ചസ്റ്റർ സിറ്റി കിരീടം ചൂടിയെങ്കിലും, മുൻ വർഷങ്ങളെ അപേക്ഷിച്ച് തങ്ങളുടെ പ്രകടനം അത്ര മികച്ചതായിരുന്നില്ലെന്ന് പരിശീലകൻ പെപ് ഗ്വാർഡിയോള പറഞ്ഞു.

വിജയത്തിന് വഴിയൊരുക്കിയ ഹാഫ് ടൈം മാറ്റങ്ങളെക്കുറിച്ച് ചോദിച്ചപ്പോൾ, ടിഎൻടി സ്‌പോർട്‌സിനോട് ഗ്വാർഡിയോളയുടെ മറുപടി ഇങ്ങനെയായിരുന്നു: “റോഡ്രിക്കായി കയ്‌സെഡോ മുന്നോട്ട് വരുമ്പോൾ പിന്നിൽ വിടവുണ്ടാകുമെന്ന് ഞങ്ങൾ കരുതി. ആ സ്ഥാനത്ത് ഷെർക്കിയെ ഉപയോഗിക്കാൻ ഞങ്ങൾ ശ്രമിച്ചു. ചിലപ്പോൾ തന്ത്രങ്ങൾ കൃത്യമായി നടപ്പിലായാലും വിചാരിച്ച ഇടം ലഭിക്കില്ല, എങ്കിലും ഞങ്ങൾ ഗോൾ കണ്ടെത്തി.”

“ഇന്നലെ ഇവിടേക്ക് വരാനുള്ള യാത്ര വളരെ ബുദ്ധിമുട്ടായിരുന്നു. ട്രെയിൻ വൈകിയതടക്കമുള്ള കാരണങ്ങളാൽ ആറ് മണിക്കൂറോളമാണ് ഞങ്ങൾ യാത്ര ചെയ്തത്. എങ്കിലും ചെൽസി വളരെ മികച്ച ടീമാണ്. എൻസോ ഫെർണാണ്ടസും കോൾ പാമറും ഉൾപ്പെടെയുള്ള താരങ്ങൾ വലിയ ഭീഷണി ഉയർത്തുന്നുണ്ട്. രണ്ടാം പകുതിയിൽ അവർ ഞങ്ങളേക്കാൾ മികച്ച രീതിയിലാണ് കളിച്ചത്.”

“ആന്റോയിനിന് ആദ്യം തന്നെ അവസരം ലഭിച്ചിട്ടും അവർ മികച്ച രീതിയിൽ പൊരുതി. ഫുട്‌ബോൾ പലപ്പോഴും ഇങ്ങനെയാണ്. കഴിഞ്ഞ സീസണിൽ ക്രിസ്റ്റൽ പാലസിനെതിരെയും, അതിനു മുൻപുള്ള സീസണിൽ യുണൈറ്റഡിനെതിരെയും ഞങ്ങൾ കളിച്ചതിനേക്കാൾ മികച്ച പ്രകടനമല്ല ഇന്ന് നമ്മൾ കാഴ്ചവെച്ചത് എന്ന് എനിക്ക് തോന്നുന്നു.”

“എന്നാൽ ഫുട്‌ബോളിൽ ചിലപ്പോഴൊക്കെ ഇങ്ങനെ സംഭവിക്കാറുണ്ട്. ഈ ജയത്തിൽ ഞങ്ങൾ വളരെ സന്തോഷവാന്മാരാണ്, ഇത് പ്രീമിയർ ലീഗിലെ ഞങ്ങളുടെ പ്രതീക്ഷകൾ സജീവമാക്കുന്നു. ഈ സീസൺ മികച്ച രീതിയിൽ അവസാനിപ്പിക്കാനാകുമെന്ന് കരുതുന്നു. ഫൈനൽ മത്സരങ്ങളിൽ എന്തും സംഭവിക്കാം. ചൊവ്വാഴ്ച രാത്രി നടക്കാനിരിക്കുന്ന മത്സരത്തിന്റെ പ്രാധാന്യം ഞങ്ങൾക്കറിയാം.”

എഫ്‌എ കപ്പ് വിജയത്തോടെ മാഞ്ചസ്റ്റർ സിറ്റി പരിശീലകനെന്ന നിലയിൽ ഗ്വാർഡിയോളയുടെ 20-ാമത്തെ കിരീട നേട്ടമാണിത്. എന്നാൽ ഇപ്പോൾ തന്റെ ശ്രദ്ധ മുഴുവൻ 2025/26 പ്രീമിയർ ലീഗ് കിരീടം കൂടി സിറ്റിക്കായി സ്വന്തമാക്കുന്നതിലാണെന്നും അദ്ദേഹം വ്യക്തമാക്കി.