ഇന്ത്യൻ സൂപ്പർ ലീഗിൽ ഈ സീസണിൽ ആദ്യമായി തുടർച്ചയായ രണ്ട് വിജയങ്ങൾ ലക്ഷ്യമിട്ട് ചെന്നൈയിൻ എഫ്സി ഇന്ന് മുഹമ്മദൻ എസ്സിയെ നേരിടും. ചെന്നൈയിലെ ജവഹർലാൽ നെഹ്റു സ്റ്റേഡിയത്തിലാണ് മത്സരം നടക്കുന്നത്. ഹോം ഗ്രൗണ്ടിൽ മികച്ച പ്രകടനം കാഴ്ചവെച്ച് മൂന്ന് പോയിന്റ് നേടാനാണ് ചെന്നൈയിൻ ടീം തയ്യാറെടുക്കുന്നത്.
കഴിഞ്ഞ മത്സരത്തിൽ ഒഡീഷ എഫ്സിയോട് സമനില വഴങ്ങിയ മുഹമ്മദൻ എസ്സി പോയിന്റ് പട്ടികയിൽ ഏറ്റവും അവസാനമാണ് നിൽക്കുന്നത്. എട്ട് മത്സരങ്ങളിൽ നിന്ന് ഒരു പോയിന്റ് മാത്രമാണ് അവർക്കുള്ളത്. അതേസമയം, എട്ട് മത്സരങ്ങളിൽ നിന്ന് എട്ട് പോയിന്റുള്ള ചെന്നൈയിൻ എഫ്സി, കഴിഞ്ഞ കളിയിൽ ഡൽഹിക്കെതിരെ നേടിയ വിജയത്തിന്റെ ആത്മവിശ്വാസത്തിലാണ് ഇറങ്ങുന്നത്.
മുഖ്യ പരിശീലകൻ മിറാൻഡയ്ക്ക് അസുഖമായതിനാൽ അസിസ്റ്റന്റ് കോച്ച് ആന്റണി ഫെർണാണ്ടസാണ് വാർത്താസമ്മേളനത്തിൽ സംസാരിച്ചത്. മുഹമ്മദൻ എസ്സി പോയിന്റ് പട്ടികയിൽ പിന്നിലാണെങ്കിലും അവരെ വിലകുറച്ചു കാണുന്നില്ലെന്നും, ഓരോ മത്സരത്തിലും ശ്രദ്ധ കേന്ദ്രീകരിച്ച് മുന്നോട്ടു പോകാനാണ് ടീമിന്റെ തീരുമാനമെന്നും അദ്ദേഹം വ്യക്തമാക്കി. ഡൽഹിക്കെതിരായ വിജയം ടീമിന് വലിയൊരു ആത്മവിശ്വാസം നൽകിയിട്ടുണ്ടെന്നും അദ്ദേഹം കൂട്ടിച്ചേർത്തു.