2012/13 സീസണിൽ ലാലിഗയിൽ അരങ്ങേറ്റം കുറിച്ചതിന് ശേഷം ഏറ്റവും കൂടുതൽ ഗോളുകൾ നേടുന്ന സ്പാനിഷ് താരമെന്ന റെക്കോർഡ് സെൽറ്റ ഡി വിഗോയുടെ മുന്നേറ്റനിര താരം ഇയാഗോ അസ്പാസ് സ്വന്തമാക്കി. 171 ഗോളുകളാണ് താരം ഇതുവരെ ലാലിഗയിൽ അടിച്ചുകൂട്ടിയത്.

വിവിധ സീസണുകളിലായി സ്ഥിരതയാർന്ന പ്രകടനമാണ് അസ്പാസ് കാഴ്ചവെക്കുന്നത്. 2017/18 സീസണിൽ 22 ഗോളുകൾ നേടിയതാണ് താരത്തിന്റെ കരിയറിലെ ഏറ്റവും മികച്ച നേട്ടം. കൂടാതെ 2021/22 സീസണിൽ 18 ഗോളുകളും, 2020/21, 2019/20 സീസണുകളിൽ 14 ഗോളുകൾ വീതവും താരം സ്കോർ ചെയ്തിട്ടുണ്ട്.

തന്റെ കരിയറിന്റെ അവസാന ഘട്ടത്തിലും മികച്ച ഫോം തുടരുന്ന അസ്പാസ്, നടപ്പുവർഷത്തെ 2025/26 സീസണിൽ ഇതിനോടകം അഞ്ച് ഗോളുകൾ നേടിക്കഴിഞ്ഞു. കഴിഞ്ഞ രണ്ട് സീസണുകളിലായി യഥാക്രമം 10, ഒൻപത് ഗോളുകളും താരം നേടിയിരുന്നു.

കരിയറിൽ 16 സീസണുകൾ പിന്നിടുമ്പോൾ എല്ലാ മത്സരങ്ങളിലുമായി 524 മത്സരങ്ങളിൽ ബൂട്ടണിഞ്ഞ അസ്പാസ് 214 ഗോളുകളാണ് അടിച്ചുകൂട്ടിയത്. ഇതിൽ ഭൂരിഭാഗം ഗോളുകളും സെൽറ്റ ഡി വിഗോയ്ക്ക് വേണ്ടിയാണ് താരം നേടിയത്. ക്ലബ്ബിന്റെ എക്കാലത്തെയും മികച്ച താരങ്ങളിലൊരാളായാണ് അസ്പാസ് ഇപ്പോൾ കണക്കാക്കപ്പെടുന്നത്.