പ്രീമിയർ ലീഗിലെ ആഴ്സണലിന്റെ കിരീടപ്പോരാട്ടത്തെക്കുറിച്ച് മാഞ്ചസ്റ്റർ സിറ്റി താരം ബെർണാഡോ സിൽവയുടെ പ്രതികരണം ശ്രദ്ധേയമാകുന്നു. ടീം സാധാരണ നിലയിലായിരുന്നെങ്കിൽ മാഞ്ചസ്റ്റർ സിറ്റി തന്നെ കിരീടം നേടുമായിരുന്നുവെന്നാണ് സിൽവ പറയുന്നത്.

“ആഴ്സണൽ ടീം വളർന്നുവരികയാണ്. ഏകദേശം അഞ്ച് വർഷമായി ഒരുമിച്ച് കളിക്കുന്ന സംഘമാണ് അവരുടേത്. അതിനാൽ കിരീടത്തിനായി അവർ വെല്ലുവിളി ഉയർത്തുന്നത് സ്വാഭാവികം മാത്രമാണ്. എന്താണ് സംഭവിക്കാൻ പോകുന്നതെന്ന് നമുക്ക് കാത്തിരുന്ന് കാണാം,” സിറ്റി താരം ദ അത്ലറ്റിക് എന്ന മാധ്യമത്തോട് പറഞ്ഞു.

“ഞാൻ ആഴ്സണലിന്റെ വലിയ ആരാധകനൊന്നുമല്ല. ലിവർപൂളാണ് ഞങ്ങളുടെ പ്രധാന എതിരാളികൾ എന്നാണ് ഞാൻ വിശ്വസിക്കുന്നത്. ഞങ്ങളുടേത് ഒരു പരിവർത്തന കാലഘട്ടമായിരുന്നു. ആ സമയത്ത് ഞങ്ങൾക്ക് ഒരുപാട് പിഴവുകൾ സംഭവിച്ചു. അത്തരം തെറ്റുകൾ ഉണ്ടായിരുന്നില്ലെങ്കിൽ ഞങ്ങൾ തന്നെ ഈ ലീഗ് കിരീടം സ്വന്തമാക്കിയേനെ,” സിൽവ കൂട്ടിച്ചേർത്തു.

“എളുപ്പത്തിൽ ജയിക്കാമായിരുന്നു എന്നല്ല ഞാൻ പറയുന്നത്, എങ്കിലും ആ പിഴവുകൾ സംഭവിച്ചില്ലായിരുന്നെങ്കിൽ ഞങ്ങൾ ലീഗ് ചാമ്പ്യന്മാരാകുമായിരുന്നു. ഇത് തീർത്തും നിരാശാജനകമാണ്,” അദ്ദേഹം വ്യക്തമാക്കി.

ലീഗിൽ രണ്ട് മത്സരങ്ങൾ മാത്രം ശേഷിക്കെ, മാഞ്ചസ്റ്റർ സിറ്റിയേക്കാൾ രണ്ട് പോയിന്റ് മുന്നിലാണ് ആഴ്സണൽ. ഇനി വരാനിരിക്കുന്ന മത്സരങ്ങളിൽ ബേൺലി, ക്രിസ്റ്റൽ പാലസ് എന്നിവരെയാണ് ആഴ്സണൽ നേരിടേണ്ടത്. ഇതിൽ ബേൺലി നേരത്തെ തന്നെ ലീഗിൽ നിന്നും പുറത്തായിക്കഴിഞ്ഞു.