വില്ല പാർക്കിലെ തോൽവി ലിവർപൂളിന്റെ ചാമ്പ്യൻസ് ലീഗ് സാധ്യതകൾക്ക് തിരിച്ചടിയായി. പോയിന്റ് പട്ടികയിൽ ലിവർപൂളിനെ മറികടന്ന് ആസ്റ്റൺ വില്ല മുന്നിലെത്തി. 37 മത്സരങ്ങളിൽ നിന്ന് 62 പോയിന്റുമായി വില്ല നിൽക്കുമ്പോൾ, 59 പോയിന്റുമായി ലിവർപൂൾ പിന്നിലാണ്. ലീഗിലെ അവസാന മത്സരത്തിൽ ബ്രെന്റ്ഫോർഡിനെ നേരിടാനൊരുങ്ങുന്ന ആർനെ സ്ലോട്ടിന്റെ സംഘത്തിന് ഈ തോൽവി വലിയ സമ്മർദ്ദമാണ് നൽകുന്നത്.
മത്സരത്തിന് ശേഷമുള്ള സലാഹിന്റെ പ്രതികരണം ഏറെ ശ്രദ്ധിക്കപ്പെട്ടു. ഈ സീസണിൽ വീണ്ടും പരാജയപ്പെടുന്നത് വേദനിപ്പിക്കുന്നതാണെന്നും, ലിവർപൂളിനെപ്പോലൊരു ക്ലബ്ബിന് ചാമ്പ്യൻസ് ലീഗ് യോഗ്യത എന്നത് ഏറ്റവും കുറഞ്ഞ ആവശ്യം മാത്രമാണെന്നും അദ്ദേഹം പറഞ്ഞു.
“ഈ സീസണിൽ വീണ്ടും പരാജയപ്പെട്ടത് ഏറെ വേദനിപ്പിക്കുന്നു, നമ്മുടെ ആരാധകർ ഇതർഹിക്കുന്നില്ല. എതിരാളികൾ ഭയക്കുന്ന പഴയ ‘ഹെവി മെറ്റൽ’ ആക്രമണ ഫുട്ബോളിലേക്ക് ലിവർപൂൾ തിരിച്ചുവരണം. കിരീടങ്ങൾ നേടുന്ന ടീമായി മാറണം. ഞാൻ കളിക്കാൻ ആഗ്രഹിക്കുന്ന ഫുട്ബോൾ അതാണ്. ആ ശൈലി ക്ലബ് തിരിച്ചുപിടിക്കണം. അത് മാറ്റമില്ലാത്ത ഒന്നായിരിക്കണം, ക്ലബ്ബിലേക്ക് വരുന്ന എല്ലാവരും അതിനനുസരിച്ച് മാറണം,” സലാഹ് കുറിച്ചു.
വില്ലയോടേറ്റ തോൽവിക്ക് ശേഷം സലാഹിന്റെ പ്രതികരണം
സലാഹിന്റെ പ്രസ്താവന വലിയ ചർച്ചകൾക്കാണ് വഴിവെച്ചിരിക്കുന്നത്. മത്സരത്തിൽ ആസ്റ്റൺ വില്ലയുടെ ആക്രമണങ്ങൾക്ക് മുന്നിൽ ലിവർപൂൾ പ്രതിരോധം പലതവണ തകർന്നു. മോർഗൻ റോജേഴ്സിലൂടെ വില്ല ലീഡ് എടുത്തു. പിന്നീട് വിർജിൽ വാൻ ഡൈക് സമനില ഗോൾ നേടിയെങ്കിലും, ഒല്ലി വാട്കിൻസിന്റെ രണ്ട് ഗോളുകളും ജോൺ മക്ഗിന്നിന്റെ ഗോളും ലിവർപൂളിന് തിരിച്ചടിയായി. വാൻ ഡൈക് അവസാന നിമിഷം ഒരു ഗോൾ കൂടി മടക്കിയെങ്കിലും ഫലം മാറിയില്ല.
സീസണിന്റെ അവസാനഘട്ടത്തിൽ തുടരുന്ന മോശം പ്രകടനം ലിവർപൂളിന്റെ ചാമ്പ്യൻസ് ലീഗ് പ്രതീക്ഷകളെ അവതാളത്തിലാക്കിയിട്ടുണ്ട്. ജർഗൻ ക്ലോപ്പിന്റെ കാലഘട്ടത്തിൽ ലിവർപൂളിനെ ലോകത്തിലെ ഏറ്റവും മികച്ച ടീമുകളിലൊന്നാക്കി മാറ്റിയ ആക്രമണ ഫുട്ബോളിനെയാണ് സലാഹ് വീണ്ടും ഓർമ്മിപ്പിച്ചത്.
ലിവർപൂളിന്റെ ഫുട്ബോൾ ശൈലിയിൽ മാറ്റം വരുത്താൻ കഴിയില്ലെന്ന് സലാഹ് ഉറപ്പിച്ചു പറയുന്നു. ക്ലബ്ബിന്റെ മാനേജ്മെന്റിനും പരിശീലകർക്കും പുതിയ കളിക്കാർക്കും കൂടിയുള്ള മുന്നറിയിപ്പായാണ് ഈ വാക്കുകൾ വിലയിരുത്തപ്പെടുന്നത്.
Also Read: ചെൽസിയിലേക്ക് ചാബി അലോൺസോ; നാല് വർഷത്തെ കരാർ പ്രഖ്യാപനത്തിനൊരുങ്ങി ബ്ലൂസ്
താൻ ക്ലബ്ബ് വിട്ടാലും ടീമിന്റെ നിലവാരം കാത്തുസൂക്ഷിക്കണമെന്ന സലാഹിന്റെ പരാമർശം അദ്ദേഹത്തിന്റെ ഭാവി സംബന്ധിച്ച അഭ്യൂഹങ്ങളും ശക്തമാക്കുന്നുണ്ട്. എന്തായാലും ചാമ്പ്യൻസ് ലീഗ് പ്രതീക്ഷകൾ നിലനിർത്താൻ ബ്രെന്റ്ഫോർഡിനെതിരായ അവസാന മത്സരം ലിവർപൂളിന് നിർണായകമാണ്.
വെറുമൊരു തോൽവി എന്നതിലുപരി, ടീമിന്റെ നിലവിലെ പോക്കിനെതിരായ ശക്തമായ ശബ്ദമായാണ് സലാഹിന്റെ പ്രതികരണം മാറുന്നത്. ലിവർപൂൾ പഴയതുപോലെ വീണ്ടും എതിരാളികൾക്ക് പേടിസ്വപ്നമാകണമെന്നാണ് സലാഹ് ആഗ്രഹിക്കുന്നത്.