ഇന്ത്യൻ സൂപ്പർ ലീഗിൽ കേരള ബ്ലാസ്റ്റേഴ്സിനായി ബൂട്ടണിഞ്ഞ ഘാന താരം ക്വാമെ പെപ്രയ്ക്ക് കംബോഡിയയിൽ സ്വപ്നതുല്യമായ നേട്ടം. കംബോഡിയൻ ഹൻ സെൻ കപ്പിന്റെ ആവേശകരമായ ഫൈനലിൽ ഇരട്ട ഗോളുകളുമായി ഹീറോയായ പെപ്ര, തന്റെ പുതിയ ക്ലബ്ബായ പ്രീ ഖാൻ റീച്ച് സ്വായ് റീംഗിന് കിരീടം നേടിക്കൊടുത്തു. മത്സരത്തിലെ മികച്ച താരമായി തിരഞ്ഞെടുക്കപ്പെട്ടതും പെപ്ര തന്നെയാണ്.
പ്രമുഖ ക്ലബ്ബായ നോം പെൻ ക്രൗണിനെതിരെ നടന്ന ഫൈനൽ മത്സരം ആദ്യാവസാനം ആവേശം നിറഞ്ഞതായിരുന്നു. നിശ്ചിത സമയത്തും അധിക സമയത്തും ഇരു ടീമുകളും രണ്ട് ഗോളുകൾ വീതം നേടി സമനില പാലിച്ചപ്പോൾ, പെപ്രയായിരുന്നു സ്വായ് റീംഗിന്റെ രണ്ട് ഗോളുകൾക്കും അവകാശി. മത്സരത്തിൽ തന്റെ ടീം പിന്നോട്ട് പോയ ഘട്ടങ്ങളിലെല്ലാം നിർണായക ഗോളുകളുമായി പെപ്ര രക്ഷകനാവുകയായിരുന്നു.
തുടർന്ന് പെനാൽറ്റി ഷൂട്ടൗട്ടിലേക്ക് നീണ്ട മത്സരത്തിൽ 5−3 എന്ന സ്കോറിന് സ്വായ് റീംഗ് വിജയം സ്വന്തമാക്കി കിരീടത്തിൽ മുത്തമിട്ടു. ഫൈനലിലെ മിന്നും പ്രകടനത്തോടെ പെപ്ര ആരാധകരുടെ ഹൃദയത്തിൽ ഇടംപിടിച്ചു.
കഴിഞ്ഞ സീസണിൽ കേരള ബ്ലാസ്റ്റേഴ്സിൽ വലിയ പ്രതീക്ഷകളോടെ എത്തിയ താരമായിരുന്നു ക്വാമെ പെപ്ര. എന്നാൽ, മഞ്ഞപ്പടയിൽ തിളങ്ങാൻ അദ്ദേഹത്തിനായിരുന്നില്ല. ബ്ലാസ്റ്റേഴ്സിനായി കളിച്ച മത്സരങ്ങളിൽ പ്രതീക്ഷകൾക്കൊത്ത് ഉയരാതെ പോയ പെപ്രയെ ഈ സമ്മർ ട്രാൻസ്ഫർ ജാലകത്തിലാണ് ക്ലബ്ബ് ഒഴിവാക്കിയത്. തൊട്ടുപിന്നാലെ ഫ്രീ ട്രാൻസ്ഫറിൽ കംബോഡിയൻ ക്ലബ്ബിലെത്തിയ താരം, തന്റെ ആദ്യ സീസണിൽ തന്നെ ക്ലബ്ബിന് ഒരു പ്രധാന കിരീടം നേടിക്കൊടുത്തത് അദ്ദേഹത്തിന്റെ കരിയറിലെ വലിയൊരു തിരിച്ചുവരവ് കൂടിയാണ്. ബ്ലാസ്റ്റേഴ്സിൽ നിറംമങ്ങിയെങ്കിലും കംബോഡിയയിൽ തകർപ്പൻ ഫോമിൽ കളിക്കുന്ന പെപ്രയുടെ പ്രകടനം ഇന്ത്യൻ ഫുട്ബോൾ ആരാധകരും കൗതുകത്തോടെയാണ് നോക്കിക്കാണുന്നത്.
