ഡയാരിയോ സ്‌പോർട്ടിന്റെ റിപ്പോർട്ട് പ്രകാരം, ലോൺ കാലാവധി പൂർത്തിയാക്കി ക്യാമ്പ് നൗവിലേക്ക് മടങ്ങാൻ അൻസു ഫാറ്റി ആഗ്രഹിക്കുന്നുണ്ടെങ്കിലും, താരത്തെ ടീമിൽ നിലനിർത്തേണ്ടതില്ലെന്ന നിലപാടിലാണ് ബാഴ്‌സലോണ.

ക്ലബ്ബിലെ ഉയർന്ന ശമ്പളച്ചെലവ് കുറയ്ക്കുന്നതിനും, പുതിയ താരങ്ങളെ നിബന്ധനകളില്ലാതെ ടീമിലെത്തിക്കാൻ സഹായിക്കുന്ന 1:1 എഫ്എഫ്പി (FFP) നിയമം പാലിക്കുന്നതിനും ഫാറ്റിയെ വിൽക്കുന്നത് നിർണായകമാണെന്ന് ബാഴ്‌സലോണ മാനേജ്‌മെന്റ് കരുതുന്നു.

താരത്തെ മൊണാക്കോയിലേക്ക് സ്ഥിരമായി മാറ്റാനുള്ള നടപടികൾ ബാഴ്‌സലോണ അന്തിമഘട്ടത്തിലാണ്. 11 ദശലക്ഷം യൂറോയുടെ ബൈ-ഔട്ട് ക്ലോസ് നൽകാൻ മൊണാക്കോ സന്നദ്ധത അറിയിച്ചിട്ടുണ്ട്.

ലാ മാസിയയുടെ ഉൽപ്പന്നമായ അൻസു ഫാറ്റി ഈ സീസണിൽ ലിഗ് വൺ ക്ലബ്ബിനായി 12 ഗോളുകൾ നേടിയിട്ടുണ്ട്.