ആഴ്സണൽ മിഡ്‌ഫീൽഡർ മൈക്കൽ മെറിനോ പരിക്കിൽ നിന്ന് സുഖം പ്രാപിക്കുന്നു. സീസൺ അവസാനിക്കുന്നതിന് മുൻപ് ടീമിലേക്ക് മടങ്ങിയെത്തുന്നതിന്റെ ഭാഗമായി താരം വീണ്ടും ഗ്രൗണ്ടിലിറങ്ങി പരിശീലനം ആരംഭിച്ചതായി ഹാൻഡ് ഓഫ് ആഴ്സണൽ റിപ്പോർട്ട് ചെയ്യുന്നു.

ജനുവരിയിൽ കാലിനേറ്റ ഗുരുതരമായ പരിക്കിനെത്തുടർന്ന് പുറത്തായിരുന്ന താരം, എത്രയും വേഗം മത്സരങ്ങളിലേക്ക് തിരിച്ചെത്താനുള്ള തീവ്രശ്രമത്തിലാണ്. എന്നാൽ, അദ്ദേഹം എന്നാണ് ഔദ്യോഗികമായി ടീമിൽ ചേരുക എന്ന കാര്യത്തിൽ വ്യക്തമായ തീയതി തീരുമാനിച്ചിട്ടില്ല.

പരിക്കേറ്റ് പുറത്തിരിക്കുമ്പോഴും ആഴ്സണലിന്റെ ലീഡർഷിപ്പ് ഗ്രൂപ്പിലെ അംഗമെന്ന നിലയിൽ ടീമിന്റെ മിക്കവാറും എല്ലാ മീറ്റിംഗുകളിലും മെറിനോ സജീവമായി പങ്കെടുക്കുന്നുണ്ട്.

ജനുവരി 25-ന് മാഞ്ചസ്റ്റർ യുണൈറ്റഡിനെതിരായ മത്സരത്തിലാണ് സ്‌പെയിൻ താരമായ മെറിനോ അവസാനമായി ആഴ്സണലിനായി കളിച്ചത്. പരിക്കിനെത്തുടർന്ന് താരം അഞ്ച് മാസം വരെ പുറത്തിരിക്കേണ്ടി വരുമെന്നും, ലോകകപ്പിൽ കളിക്കുമോ എന്ന കാര്യത്തിൽ ആശങ്കയുണ്ടെന്നും നേരത്തെ റിപ്പോർട്ടുകൾ ഉണ്ടായിരുന്നു.