അടുത്ത സീസണിലെ യുവേഫ ചാമ്പ്യൻസ് ലീഗ് യോഗ്യത നേടിയതിന് പിന്നാലെ മാഞ്ചസ്റ്റർ യുണൈറ്റഡ് താരങ്ങളുടെ ശമ്പളത്തിൽ വലിയ വർധനവ് വരുന്നുവെന്ന് ടോക്ക്‌സ്‌പോർട്ട് റിപ്പോർട്ട് ചെയ്യുന്നു.

പ്രീമിയർ ലീഗിലെ ആദ്യ അഞ്ച് സ്ഥാനങ്ങളിൽ ഫിനിഷ് ചെയ്തതിനുള്ള പ്രതിഫലമായി മൈക്കൽ കാരിക്കിന്റെ സ്ക്വാഡിലുള്ള ഭൂരിഭാഗം താരങ്ങൾക്കും ഏകദേശം 25 ശതമാനം ശമ്പള വർധനവ് ലഭിക്കും.

പുതിയ ശമ്പള ഘടനയുടെ ഭാഗമായി ക്യാപ്റ്റൻ ബ്രൂണോ ഫെർണാണ്ടസിന്റെ പ്രതിവാര ശമ്പളം 250,000 പൗണ്ടായി ഉയരുമെന്നാണ് പ്രതീക്ഷിക്കുന്നത്.

ചാമ്പ്യൻസ് ലീഗിലേക്ക് യോഗ്യത നേടുന്നതിൽ പരാജയപ്പെട്ടതിനെ തുടർന്ന് യുണൈറ്റഡ് താരങ്ങൾ ശമ്പളം വെട്ടിക്കുറയ്ക്കാൻ സമ്മതിച്ച് രണ്ട് വർഷത്തിന് ശേഷമാണ് ഇപ്പോൾ ഈ വർധനവ് നടപ്പിലാക്കുന്നത്.

നിലവിൽ ബാഴ്‌സലോണയിലും ട്രാബ്‌സോൺസ്‌പോറിലും ലോണിൽ കളിക്കുകയാണെങ്കിലും, മാർക്കസ് റാഷ്‌ഫോർഡിനും ആന്ദ്രെ ഒനാനയ്ക്കും പുതുക്കിയ ശമ്പള ഘടനയുടെ ഗുണം ലഭിക്കും. അതേസമയം, ഈ സമ്മറിൽ ഇരുവരെയും വിൽക്കാനുള്ള തീരുമാനത്തിലാണ് മാഞ്ചസ്റ്റർ യുണൈറ്റഡ്.