ഈ സീസണിൽ ഇതിനകം നടന്ന കമ്മ്യൂണിറ്റി ഷീൽഡ്, ലീഗ് കപ്പ്, സെൽഹർസ്റ്റ് പാർക്കിലെ ലീഗ് മത്സരം എന്നിവയിൽ ലിവർപൂളിനെ പരാജയപ്പെടുത്തിയ ക്രിസ്റ്റൽ പാലസ്, മറ്റൊരു ജയത്തിലൂടെ ചരിത്രം കുറിക്കാൻ ഒരുങ്ങുകയാണ്. ഒരേ സീസണിൽ ലിവർപൂളിനെ നാല് തവണ പരാജയപ്പെടുത്താനാണ് ക്രിസ്റ്റൽ പാലസ് ലക്ഷ്യമിടുന്നത്.

എന്നാൽ, കഴിഞ്ഞ വാരാന്ത്യത്തിൽ എവർട്ടനെതിരെ നടന്ന ആവേശകരമായ ഡെർബി വിജയം ലിവർപൂൾ ക്യാമ്പിന് പുതിയ ഊർജ്ജം നൽകിയിട്ടുണ്ടെന്ന് ലിവർപൂൾ പരിശീലകൻ ആർനെ സ്ലോട്ട് വ്യക്തമാക്കി.

“സീസണിൽ പലപ്പോഴും വലിയ വിജയങ്ങൾക്ക് പിന്നാലെ തിരിച്ചടികൾ നേരിടേണ്ടി വന്നിട്ടുണ്ട്. ലീഡ്‌സിനെതിരേയും ഫുൾഹാമിനെതിരേയും മികച്ച പ്രകടനം പുറത്തെടുത്തെങ്കിലും അത് സമനിലയിൽ കലാശിച്ചു. മറ്റു ചിലപ്പോൾ പ്രധാന വിജയങ്ങൾക്ക് തൊട്ടുപിന്നാലെ രണ്ടോ മൂന്നോ താരങ്ങൾക്ക് പരിക്കേൽക്കുന്ന അവസ്ഥയുണ്ടായി,” അദ്ദേഹം പറഞ്ഞു.

“എവർട്ടനെതിരായ മത്സരത്തിലും സമാനമായ അവസ്ഥയുണ്ടായി. ആരാധകരോടൊപ്പം വിജയം ആഘോഷിക്കാൻ സാധിച്ചെങ്കിലും, തൊട്ടുപിന്നാലെ ജോർജി മമർദാഷ്‌വിലിക്ക് പരിക്കേറ്റത് തിരിച്ചടിയായി.”

“എങ്കിലും, ഈ ആഴ്ച ക്ലബ്ബിന് ചുറ്റും വലിയൊരു പോസിറ്റീവ് അന്തരീക്ഷം ഞങ്ങൾ അനുഭവിക്കുന്നുണ്ട്. ഈ സീസണിൽ നേരത്തെയും ഇത്തരം സാഹചര്യങ്ങൾ ഉണ്ടായിട്ടുണ്ടെങ്കിലും ഇത്തവണ അത് വളരെ പ്രത്യേകതയുള്ളതാണ്.”

“ഈ പോസിറ്റീവ് മനോഭാവം ക്രിസ്റ്റൽ പാലസിനെതിരായ മത്സരത്തിലും നിലനിർത്തേണ്ടതുണ്ട്. ആത്മവിശ്വാസം മാത്രം കൊണ്ട് മത്സരം ജയിക്കാൻ കഴിയില്ല. ക്രിസ്റ്റൽ പാലസ് ഏറ്റവും കടുപ്പമേറിയ എതിരാളികളായതുകൊണ്ട് തന്നെ, കൃത്യമായ തന്ത്രങ്ങളോടെ കളിക്കളത്തിൽ മികച്ച പ്രകടനം പുറത്തെടുക്കേണ്ടതുണ്ട്,” ആർനെ സ്ലോട്ട് കൂട്ടിച്ചേർത്തു.