പോളണ്ട് ഗോൾകീപ്പർ ഷെസ്നി യുവന്റസ് വിട്ടു!

ട്യൂറിൻ: ഇറ്റാലിയൻ ഫുട്ബോൾ ലോകത്തെ പ്രമുഖ ഗോൾ കീപ്പർമാരിൽ ഒരാളായ വോയ്ചെക്ക് ഷെസ്നി യുവന്റസുമായുള്ള കരാർ അവസാനിപ്പിച്ചു. ഇരുവരും തമ്മിലുള്ള പരസ്പര ധാരണയാണ് ഇതിലേക്ക് നയിച്ചത് എന്നാണ് ക്ലബ്ബിന്റെ ഔദ്യോഗിക പ്രഖ്യാപനത്തിൽ പറയുന്നത്.

34 കാരനായ ഷെസ്നിക്കും യുവെന്റസിനും തമ്മിലുള്ള ഏഴ് വർഷത്തെ ബന്ധത്തിനാണ് ഇതോടെ വിരാമം ആകുന്നത്. ഇനിയും ഒരു വർഷത്തേക്ക് കരാർ ബാക്കിയുണ്ടായിരുന്നെങ്കിലും താരം ഇപ്പോൾ സ്വതന്ത്ര ഏജന്റാണ്. ഇറ്റാലിയൻ മാധ്യമങ്ങൾ ഷെസ്നിയെ ഇറ്റാലിയൻ ക്ലബ്ബ് മോൻസയും, സൗദി അറേബ്യൻ ക്ലബ്ബ് അൽ നാസറും തേടുന്നതായി റിപ്പോർട്ട് ചെയ്തിട്ടുണ്ട്.

Read Also: പൗലോ ഡിബാല സൗദിയിലേക്ക്!

2006ൽ 15-ആം വയസ്സിൽ ആഴ്സണലിൽ ആയിരുന്നു ഷെസ്നിയുടെ കരിയർ ആരംഭിച്ചത്. പിന്നീട് ബ്രെന്റ്ഫോർഡിലും എഎസ് റോമയിലും ലോണിൽ പോയ ശേഷം 2017ലാണ് താരം യുവെന്റസിലെത്തിയത്.

252 മത്സരങ്ങളിൽ യുവന്റസിന് വല കാത്തു നിന്ന ഷെസ്നിക്ക് മൂന്ന് തവണ സീരി എ കിരീടവും മൂന്ന് തവണ കോപ്പ ഇറ്റാലിയയും സ്വന്തമാക്കിയിട്ടുണ്ട്. പോളണ്ടിന് 84 തവണ കളിച്ച താരമാണ് ഷെസ്നി. ഇതിനിടെ, യുവന്റസ് മോൺസയിൽ നിന്ന് ഗോൾ കീപ്പർ മിച്ചേൽ ദി ഗ്രിഗോറിയോയെ ടീമിലെത്തിച്ചിരുന്നു.