കോപ്പ ഡെൽ റേ സെമിഫൈനൽ: അത്‌ലറ്റിക്കോ മാഡ്രിഡിനെതിരെ ബാഴ്‌സ കൂടുതൽ കൃത്യത പാലിക്കണമെന്ന് ഫ്ലിക്ക്

Subscribe to Notifications

ബാഴ്‌സലോണ, കോപ്പ ഡെൽ റേ സെമിഫൈനൽ ആദ്യ പാദത്തിൽ അത്‌ലറ്റിക്കോ മാഡ്രിഡിനെ നേരിടാൻ ഒരുങ്ങുകയാണ്. ഈ സീസണിൽ ലാലിഗയിൽ അത്‌ലറ്റിക്കോ മാഡ്രിഡിനോട് ഏറ്റ തോൽവിയിൽ നിന്ന് പാഠം ഉൾക്കൊണ്ട് കൂടുതൽ കൃത്യതയോടെ കളിക്കണമെന്ന് ബാഴ്‌സലോണ മാനേജർ ഹാൻസി ഫ്ലിക്ക് തിങ്കളാഴ്ച ആവശ്യപ്പെട്ടു.

കഴിഞ്ഞ ഡിസംബറിൽ ബാഴ്‌സയുടെ ഹോം ഗ്രൗണ്ടിൽ നടന്ന മത്സരത്തിൽ 2-1ന് അത്‌ലറ്റിക്കോ വിജയിച്ചിരുന്നു. ആദ്യ ഗോൾ ബാഴ്‌സ നേടിയെങ്കിലും, 18 വർഷത്തിനിടെ ആദ്യമായി അത്‌ലറ്റിക്കോ ബാഴ്‌സയുടെ മൈതാനത്ത് വിജയം നേടി.

“ഇതൊരു പുതിയ മത്സരമാണ്. അത് ഞങ്ങൾ തെളിയിക്കേണ്ടതുണ്ട്,” ഫ്ലിക്ക് മാധ്യമപ്രവർത്തകരോട് പറഞ്ഞു. “അത്‌ലറ്റി മികച്ച ടീമാണ്, അവർ ധാരാളം പണം നിക്ഷേപിച്ചിട്ടുണ്ട്. അവർക്ക് മികച്ച പ്രതിരോധക്കാരും ആക്രമണകാരികളുമുണ്ട്. ഇതൊരു കഠിനമായ മത്സരമായിരിക്കും…”

“തോൽവിയിൽ നിന്ന് ഞങ്ങൾ പഠിച്ച നല്ല കാര്യം, ഞങ്ങൾക്ക് നല്ല ഫുട്ബോൾ കളിക്കാൻ കഴിയും എന്നതാണ്. അവിടെ ഞങ്ങൾ കാണിച്ചത് ഉയർന്ന നിലവാരത്തിലുള്ള കളിയാണ്. അവർ ഗോൾ നേടുന്നതിന് മുമ്പ് ഒന്നോ രണ്ടോ ഗോളുകൾ നേടാൻ ഞങ്ങൾക്ക് അവസരമുണ്ടായിരുന്നു.”

“ഗോൾ നേടാനുള്ള അവസരം ഞങ്ങൾ പ്രയോജനപ്പെടുത്തണം, ഗോൾ നേടുക എന്നതാണ് പ്രധാനം. ഇത് ഒരു മത്സരം മാത്രമല്ല, രണ്ട് മത്സരങ്ങളാണെന്ന കാര്യം ഓർക്കണം.”

ലാസ് പാൽമാസിനെതിരായ 2-0 വിജയത്തിനിടെ പരിക്കേറ്റ 17 കാരനായ വിംഗർ ലാമൈൻ യമാൽ ചൊവ്വാഴ്ച കളിക്കാൻ ഉണ്ടാകുമോ എന്ന കാര്യത്തിൽ സംശയമുണ്ട്. എന്നാൽ ഡോക്ടർമാർ അദ്ദേഹത്തിന്റെ ആരോഗ്യസ്ഥിതിയെക്കുറിച്ച് നല്ല സൂചനകൾ നൽകുന്നതായി ഫ്ലിക്ക് പറഞ്ഞു.

“അദ്ദേഹത്തിന് കളിക്കാൻ കഴിയുമോ എന്ന് കാത്തിരുന്ന് കാണേണ്ടിവരും, ഡോക്ടർ ഞങ്ങളോട് പറഞ്ഞതനുസരിച്ച് സ്ഥിതിഗതികൾ പോസിറ്റീവായി കാണുന്നു. അദ്ദേഹം ഞങ്ങളോടൊപ്പം ഉണ്ടാകണമെന്ന് ഞങ്ങൾ ആഗ്രഹിക്കുന്നു,” ഫ്ലിക്ക് മാധ്യമപ്രവർത്തകരോട് പറഞ്ഞു.

ജനുവരിയിൽ കാൽക്കുഴയിലെ പരിക്കിൽ നിന്ന് മോചിതനായ മിഡ്ഫീൽഡർ ഡാനി ഒൽമോയ്ക്ക് 90 മിനിറ്റ് കളിക്കാൻ സാധിക്കുമെന്ന് ജർമ്മൻ പരിശീലകൻ കൂട്ടിച്ചേർത്തു.

ആർബി ലെയ്പ്സിഗിൽ നിന്ന് സീസണിന്റെ തുടക്കത്തിൽ ബാഴ്‌സയിൽ ചേർന്ന ഒൽമോ, 22 മത്സരങ്ങളിൽ നിന്ന് ഏഴ് ഗോളുകളും മൂന്ന് അസിസ്റ്റുകളും നേടിയിട്ടുണ്ട്. ലാസ് പാൽമാസിനെതിരായ വിജയത്തിൽ ഒൽമോ പകരക്കാരനായി ഇറങ്ങി ഗോൾ നേടി.

“എന്നെ സംബന്ധിച്ചിടത്തോളം, അദ്ദേഹത്തിന് തുടക്കം മുതൽ കളിക്കാൻ കഴിയുക എന്നതാണ് ഏറ്റവും പ്രധാനം, ഞങ്ങൾ അദ്ദേഹത്തെ ശ്രദ്ധിക്കണം, ഞങ്ങൾ അത് ചെയ്തുകൊണ്ടിരിക്കുകയാണ്,” ഫ്ലിക്ക് പറഞ്ഞു.

“ലാസ് പാൽമാസിനെതിരെ അദ്ദേഹം നേടിയ ഗോൾ വളരെ പ്രധാനപ്പെട്ടതായിരുന്നു.”

ഈ മത്സരത്തിൽ ബാഴ്സലോണ കൂടുതൽ ഗോൾ അവസരങ്ങൾ സൃഷ്ട്ടിക്കാനും കൂടുതൽ കൃത്യതയോടെ കളിക്കുവാനും ശ്രമിക്കുമെന്നും ഹാൻസി ഫ്ലിക്ക് ഉറപ്പ് നൽകി.